Link açıqlığı

Saatnıñ esas haberi

Kremlge tabi olğan Aqmescit rayon mahkemesi sentâbrniñ 27-nde, çarşenbe künü, qırımtatar milliy areketiniñ yetekçilerinden biri İlmi Umerovğa qarşı üküm çıqaracağı beklenile. Toplaşuv saat 11:30 başlanacaqtır.

Umerovnıñ imayecisi Mark Feygin Qırım.Aqiqatqa dedi ki, imaye tarafı qabaatlayıcı ükümniñ çıqarılmasına azırlana. Bunen beraber, aytqanına köre, bu vaqia aqqında malümatnıñ dünyada yayılması umumen ükümge tesir ete bile.

«Dünya bu davanıñ ketişatından haberdar etilgeni endi tesir etken edi, çünki, hatırlatayım, keçken sene o psihologik-psihiatrik ekspertizağa yerleştirilgende, bu munasebetnen bir-çoq ükümet ve cemaat teşkilâtları seslengen edi. Bunıñ sayesinde Umerovğa qarşı kerçek apis müddeti degil de, şartlı ceza qararı çıqarılmaq mümkün», – dedi Feygin.

Advokat qayd etti ki, sentâbrniñ 25-nde İnsan aqları melesinde BMT Baş komissarı tarafından Qırımdaki vaziyet aqqında taqdim etilgen maruza da Umerovğa berilecek cezanı hafiflete bile.

Rusiyeli prokuror İlmi Umerovnı 3 yıl ve 6 ay müddetine şartlı surette azatlıqtan marum etmege, oña 3 yıllıq sınav müddetini tayin etmege ve üç yıl devamında cemaat faaliyetini ve ocalıq yapmaqnı yasaqlamağa teklif etken edi.

2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

2017 senesi iyünniñ 7-nde istilâ etilgen Qırımda Kremlge tabi olğan Aqmescit rayon mahkemesi İlmi Umerov davasınıñ asılını baqıp başladı.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.

XS
SM
MD
LG