Qırım faali Marlen Mustafayev sentâbrniñ 26-da yarımadada Rusiye Taqiqat komitetine tekrar çağırıldı. Bunı «Qırım birdemligi» Facebookta bildire.
Qırımlı advokat Mammet Mambetovnıñ bildirgenine köre, faalge qarşı Rusiye Ceza kodeksiniñ 282-nci maddesi boyunca cinaiy iş açıla bile.
«Bunıñ sebebi VKontakte içtimaiy ağında paylaşqanları oldı, Marlen endi 10 kün memuriy apis yatqan edi. Mustafayevniñ özü aytqanına köre, o, azat etilgen soñ VKontakte saifesini birden silgen edi, lâkin uquq qoruyıcılar buña baqmadan, cinaiy iş açacaq ola», – dep aytıla gruppa haberinde.
Sentâbrniñ 19-da Marlen Mustafayev Aqmescitniñ Kiyev rayonı Rusiye Taqiqat komitetiniñ idaresinde sorğuğa çekildi. Bu sorğu daa açılmağan cinaiy işniñ taqiqattan evel teşkerüvi çerçivesinde ötkerilgen edi.
2017 senesi fevralniñ 21-de Marlen Mustafayevniñ evinde Rusiye uquq qoruyıcıları tintüv ötkerdi. Şu künü Aqmescitniñ Kiyev rayon mahkemesi onı Rusiye Memuriy cinayet kodeksiniñ 20.3 maddesiniñ 1-inci qısmı («Ekstremist teşkilâtlarınıñ timsallerini açıq kösterüv ya da teşviqatı») boyunca qabaatlı dep tanıdı. O, 11 künge memuriy apiske alınğan edi.
Rusiye Qırımnı işğal etken soñ yarımadada mustaqil jurnalistler, cemaat faalleriniñ evlerinde tintüvler ötkerile, sorğular ola. Uquq qorçalayıcılar bunı «farqlı fikirlerge qarşı küreş» dep adlandıralar.
