Link açıqlığı

Kyivdeki Rusiye elçihanesi yanında Qırımda ğayıp olğanlar aqqında hatırlatacaqlar


Kyivdeki Rusiye elçihanesi yanında «Ervin qayda?» aktsiyası, 2017 senesi iyün

Kyivdeki Rusiye elçihanesiniñ binası yanında sentâbrniñ 27-de «FIND & FREE» informatsion kampaniyası çerçivesinde «Ervin qayda?» XV aktsiyası keçirilecektir. Teşkilâtçılarnıñ bildirgenine köre, faaller işğal etilgen Qırımda qaçırılğan ve ğayıp olğan insanlarnıñ soy-sopları is etken duyğular aqqında tarif etecekler.

«Ğayıp olğan insanlarnıñ aqrabaları ne tüşüne? Faaller «Yula v golove» aktsiyasını taqdim etecek. Tuvğanlarını qıdırmağa devam etkenlerniñ duyğuları kösterilecektir», – dep aytıla haberde.

Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».

Faallerniñ bildirgenine köre, Rusiye Qırımnı işğal etkeninen 44 qırımlı ğayıp oldı. 17 insan tapıldı, 19 – bugünge qadar ğayıp sayıla, 6 – ölü tapılğan, daa ekisi apiste yata.

Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.

Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.


XS
SM
MD
LG