Rusiye Taqiqat komiteti Qırım idaresiniñ hadimleri İçki rayonınıñ Üç Quyu (Vostoçnoye) köyüniñ sakini Memet Ablâlimovnıñ evinde tintüv keçirdi. Bu aqta faal Rustem Mennanov Qırım.Aqiqatqa bildirdi.
Onıñ aytqanına köre, tintüv sentâbrniñ 20-de Sudaq şeer şurasınıñ qararı ile Rusiye Ceza kodeksiniñ 238-inci maddesi (havfsızlıq talaplarına zıt kelgen mal ve mahsulatnıñ işlep çıqarılması, saqlanması, taşınması ve satışı) boyunca açılğan cinaiy iş çerçivesinde ötkerildi.
«Evinde tintüv keçirilgen erkek yaqında tükânda çalışmağa başladı, meyva satacaqsın, degenler. Anda meyvalardan ğayrı, içki satılğanını körgen soñ, o, razı olmağanını aytıp işten boşadı. Soñra evine tintüv keçirmege kelgenler. Evinde bir şey tapılmadı», – dep tarif etti faal.
Rustem Mennanovnıñ aytqanına köre, tintüv arfesinde İçki rayonında küç idareleri alkogol tahrivatı azırlanğan gizli tsehni tapqan ediler.
«Olar (uququ qoruyıcılar) cinaiy iş çerçivesinde mümkün olğanı qadar çoq tintüv keçirecek edi. Bu oğlannıñ evinde bir şey yoq edi, tintüv keçirgenleri içün afu sorağanlar», – dep ayta Mennanov.
Rusiye Taqiqat komiteniñ Qırım idaresi bunı izaatlamay.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.
