Sentâbrniñ 20-de Bağçasarayda «Qırım birdemligi» birleşmesiniñ faalleri Osman Belâlovnıñ para cezasını «Qırım marafonı» aktsiyası devamında toplanğan 10 rublelik kapiklernen ödedi. Para cezasınıñ miqdarı 150 biñ ruble (tahminen 67 biñ grivna) ola. Kreml nezaretindeki Qırım mahkemesi Belâlovnı qanunsız mitingde iştirak etmesinde qabaatlap, oña böyle bir ceza bergen edi.
«Ümüt etemiz ki, vatandaş faali Osman Belâlovğa qarşı sanktsiya ve iddialar çıqarılır, unutılır ve, ümüt etem ki, tekrarlanmaz», – dedi «Qırım marafonınıñ» faali Facebooktaki yayında.
Osman Belâlovnıñ özü halqı oña qoltutqanını is etti, dep tarif etti.
«Bu birinci para cezam degil. İlk sefer dost ve qardaşlarıma qoltutqanım içün meni 10 biñge (tahminen 4 biñ 500 grivna – QA) cezalağan ediler. Men doğru areket etkenimden şübelenmedim. Çıqqanda qayda ketkenimni añlay edim, dost ve qardaşlarımnıñ tintüvlerine bara edim, men bu insanlarnı tanıyım, olar cemaatqa yaramay bir şey yapmaz», – dedi Belâlov.
Sentâbrniñ 14-de Bağçasarayda «Qırım birdemligi» birleşmesiniñ faalleri «Qırım marafonı» aktsiyası çerçivesinde Zarema Ümerovanıñ para cezasını ödedi. O, Facebookta Ukrainağa qoltutuv yazuvları içün Rusiye Ceza kodeksiniñ 282-nci maddesi boyunca 300 biñ ruble (tahminen 130 biñ grivna – QA) para cezası alğan edi.
İyülniñ 31-de işğal etilgen Qırımda «Qırım birdemligi» «Qırım marafonı» adı altında para toplamağa başladı. Böylece, faaller siyasiy mabüs ve faallerge yardım etecek olalar. Avgustnıñ 22-ne qadar faaller 820 biñ ruble (tahminen 352 biñ grivna) topladı. Teşkilâtçılar aktsiyanı devam ettirecek ola.
Aktsiya devamında para 10 rublelik kapik şeklinde toplandı. Böylece, «lâqayt qalmağanlarnıñ birligi» kösterildi.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.
