Kreml nezaretindeki Aqmescit şeer şurasınıñ deputatları şeer memuriyetiniñ yañı yolbaşçısını sayladı. Bu vazifege Qırım parlamentiniñ iqtisadiy, bücet-maliye ve bergi siyaseti komitetiniñ reisi İgor Lukaşev keçti. Bu aqta Qırım kütleviy haber vastaları bildire.
Rey berilmezden Lukaşev şeer şurasınıñ toplaşuvında çıqışta bulundı.
«Men programmamnı yarışta seslendirgen edim. Şeerdeki işniñ maqsadı – Aqmescitni Qırımnıñ kerçek paytahtına çevirecek programma ve taqımnı meydanğa ketirmektir. Bugün er şey bar. Federal, Qırım yolbaşçısı, Aqmescitlilerniñ destegi bar. Esnaslar inqilâpçı degil de, tekâmul olacaq. İnqilâplar endi çoq oldı», – dep tekrarlay Lukaşevniñ aytqanlarını «Krıminform».
Bu namzetke 31 deputattan 29-ı qoltuttı.
Qırımda Aqmescit memuriyetiniñ Rusiye yolbaşçısı ola bilecek eki namzet belgilengen edi. Bular Kreml nezaretindeki Qırım parlamentiniñ iqtisadiy, bücet-maliye ve bergi siyaseti komitetiniñ reisi İgor Lukaşev ve «Krıminform» saytınıñ baş müdiri Maksim Nikolayenko.
Avgustnıñ 30-da Rusiye nezaretindeki Aqmescit şeer yolbaşçısı Gennadiy Baharev istifağa çıqtı. Resmiy şekilde sağlıq alı sebep olğan, dep bildirilgen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
