Link açıqlığı

Qırımda «fevral 26 davasınıñ» mahkeme oturışı başqa künge avuştırıldı – advokat


Qırımda sentâbrniñ 22-de Kreml nezaretindeki Merkeziy rayon mahkemesi «fevral 26 davasınıñ» oturışını oktâbrniñ 3-de keçirmege qarar aldı. Dava mabüsi Ali Asanov qabaatlayıcı qararnıñ deñişmelerini ögrenip yetiştiremedi.

Bu aqta Qırım advokatı Edem Semedlâyev tarif etti.

«Fevral 26 davasınıñ» mahkeme oturışı başlamazdan bitti. Ali Asanovğa qabaatlayıcı qararnıñ deñişmelerine dair muracaat bir kün evelsi berildi, o, tanış olmağa yetiştirmeyip azırlanamadı. Bu sebepten oturış oktâbrniñ 3-ne saat 9:30-ğa qaldırıldı», – dedi Semedlâyev video muracaatında. Onı Facebookta faal Nariman Celâl derc etti.

Prokuratura qabaatlayıcı qararnı ne içün deñiştirgenini advokatlar aytıp olamadı.

2017 senesi sentâbrniñ 8-de olğan mahkemede Rusiye prokurorı qabaatlayıcı qarardan 83 yaralı olğanını ve mahkümler binağa kirmege tırışqanını alıp taşlamağa teklif etti. O, Eskender Kantemirovnı qalabalıqlarda ve yaralı Berbenetske beden zarar ketirmesinde, Mustafa Degermenci ve Eskender Emirvaliyevni yaralı Şlâginge beden zarar ketirmesinde, Ali Asanov ve Arsen Yunusovnı ise yaralı İvkinge qarşı zorbalıq qullanmasında qabaatlamağa teklifte bulundı.

Kreml kontrol etken Aqmescit Merkeziy rayon mahkemesi iyülniñ 20-de «fevral 26 davasınıñ» mabüsleri Ali Asanov ve Mustafa Degermenciniñ ev apsinde bulunma müddetini oktâbrniñ 7-ne qadar uzattı.

«Fevral 26 davasınıñ» mabüsleri Mustafa Degermenci ve Ali Asanov aprelniñ 6-dan berli ev apsinde bulunalar. Bundan evel ise Aqmescit SİZOsında yatqan ediler.

2015 senesi yarımadada qırımtatar faallerini 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni içün mahküm etmege başladılar. Olarnı qalabalıqlarda iştirak etkeninde qabaatlaylar.

Soñra mahkeme «fevral 26 davasını» ekige böldi: Qırımtatar Milliy Meclisiniñ reis muavini sıfatındaki Ahtem Çiygozniñ davası olaraq ve ayrıca esnasnıñ diger iştirakçileri olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev davası şeklinde.



XS
SM
MD
LG