Link açıqlığı

Daa evel qaçırılğan Renat Paralamovnıñ anası Qırımdaki FSB yolbaşçısınıñ muavini ile körüşti


Advokat Emil Kürbedinov Renat Paralamovnıñ soy-soplarınen beraber Qırımdaki Rusiye FSB idaresi yanında, arhiv fotoresimi

Daa evel qaçırılıp azaplarğa oğratılğan qırımlı Renat Paralamovnıñ anası Pakize Paralamova advokat Emil Kürbedinovnen beraber sentâbrniñ 20-de Qırımdaki Rusiye FSB idaresini ziyaret etip, idare yolbaşçısınıñ muavini ile körüşkenler.

«Ana (Paralamovnıñ qaçırılıp azaplarğa oğratılması aqqında – QA) tüşüngenlerini birer-birer ikâye etti. O, maskalı insanlar ileride birisiniñ balasını qaçırıp, azaplar oğratmasını istemey, dep ayttı. O, bunı kimler yapqanında şübesi olmağanını bildirdi», – dep tarif etti Kürbedinov Qırım.Aqiqatqa.

Kürbedinovnıñ aytqanına köre, FSB hadimi uquq qoruyıcılar tarafından böyle bir şey yapılğanı aqqında haberi olmağanını qayd etti.

«O (FSB hadimi – QA), dedi ki, Paralamov özü kelip ketti, ertesi künü ise kene FSB binasına qaytıp keldi», – dep qoştı advokat.

«Bizni eşitirlermi – bu endi başqa mesele. Amma bu adise raat qaldıramaz. İnsanlar ne tüşünsiñ: özüni qorçalamağa aqları barmı? Belgisiz insanlar betini qapatıp, qoradan atlap kire ve insanlarnı qaçıra. Olar (Rusiye uquq qoruyıcıları – QA) üç yıl devamında qırımtatarlarnıñ evlerinde tintüvler ötkerip, ne silâ, ne de yasaqlanğan bir şey tapmağanlar. Mahkeme tintüv keçirmege qarar çıqarsa, maskasız kelip, «mahsus tedbirler» keçirmesinler», – dedi advokat.

Renat Paralamovnıñ anası Pakize Paralamova FSB idaresine çağırılğanı sentâbrniñ 19-da belli oldı.

Sentâbrniñ 13-de saba Qırımnıñ Seitler qasabasında yaşağan qırımlı Renat Paralamovnıñ evinde küç idaresiniñ hadimleri «tedqiqat ve taqiqat areketleri» dep adlandırğan tintüv ötkergen edi. Advokat Emil Kurbedinovnıñ tahminlerine köre, «teşkerüv» Paralamovnıñ diniy saadaki faalliyetinen bağlıdır. Şaatlarnıñ aytqanlarına köre, maska kiygen ve urbasından kim ekenligi belgisiz olğan şahıslar Parlamovnı belli olmağan tarafqa alıp ketken. Keççe belli olğanı kibi, olar onıñ kitap ve notebookını çekip alğanlar.

Paralamov sentâbrniñ 14-de kündüz soy-soplarınen bağlandı. O, Aqmescit avtovokzalında tapıldı. Paralamov «kim olğanı belli olmağan insanlar oña azap çektirgenini, başına çuval kiydirgenini, tok qullanılğanını» tarif etti.

Sentâbrniñ 15-de Paralamovnıñ soy-soplarınen beraber Qırımdaki Rusiye FSB idaresiniñ binası yanında bulunğan advokat Emil Kürbedinovnıñ aytqanına köre, olar FSB binasına kirgenlerden biri Renat Paralamovnıñ qaçırılmasında iştirak etkenini tanığanlar

Rusiye küç idareleriniñ bunıñnen bağlı izaatları daa olmadı.

XS
SM
MD
LG