Qırımtatar milliy areketiniñ liderlerinden biri İlmi Ümerov çarşenbe künü, sentâbrniñ 27-de, Kreml nezaretindeki Aqmescit rayon mahkemesinde soñ sözüni ayttı. Ümerov qabaatsız olğanını aytıp, Qırımnıñ işğalci mahkemesi çıqaracaq ükümge baqmadan, küreşine devam etecegini qayd etti.
«Rusiye ögünde bir de bir qabaatım yoq! O, menim ögümde qabaatlıdır! O, Ukrainağa istilâ etti, Vatanım Qırımnı işğal etti!», – dep qayd etti Ümerov.
O, oña qarşı dava uydurılğanına diqqatnı celp etti. Ümerov, onı yayında aytqanları içün degil de, gizlemegen siyasiy baqış ve işançları içün mahküm eteler, dep qayd etti.
«Mayıs ayından berli maña qarşı açılğan davanıñ mahkeme oturışları devamında qabaatnıñ boş olğanı isbatlandı. FSB üç tomlıq cinaiy işni bir yılda adam aqıllı uydurıp olamadı. Buña baqmadan, prokuror maña qarşı qabaatlayıcı üküm çıqarılmasını istedi», – dedi Ümerov.
Onıñ qayd etkenine köre, o ve imayesi ancaq aqlayıcı ükümge razılar, er angi diger qarar mahkemege şikâyet etilecek, soñra da halqara mahkemelerge muracaat etilecektir.
«Nasıl olsa da, hayal qurmaymız, aqlayıcı üküm olacağını beklemeymiz. Ukrainanı satqanlar bugün Qırımda hain çıqmağanlarnı mahküm ete! Hainler vatanperverlerni mahküm ete! Ükümge baqmadan, küreş devam ete!.. Gaagada körüşirmiz!», – dep ayttı Ümerov.
Qırımtatar milliy areketi liderlerinden biri İlmi Ümerovnıñ davası boyunca üküm sentâbrniñ 27-de, çarşenbe künü, Kreml nezaretindeki Aqmescit rayon mahkemesinde ilân etilecektir.
Çarşenbe künü, sentâbrniñ 20-de, prokuror İlmi Ümerovğa şartlı olaraq 3 yıl ve 6 ay apis cezası berilmesini istedi. Onıñ 3 yıl müddetinen açıq faaliyetinen ve ocalıqnen oğraşması yasaqlana bile.
2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
