Link açıqlığı

İlmi Ümerovnıñ ükmü sentâbrniñ 27-de çıqarılacaqtır


Qırımtatar milliy areketi liderlerinden biri İlmi Ümerovnıñ davası boyunca üküm sentâbrniñ 27-de, çarşenbe künü, Kreml nezaretindeki Aqmescit rayon mahkemesinde ilân etilecektir.

Qırım.Aqiqat mühbiriniñ bildirgenine köre, mahkeme oturışı saat 11:00 başlanacaq.

Sentâbrniñ 20-de Ümerov munaqaşa devamında çıqışta bulunıp, taqiqatçı İgor Skripka ve ekspert Olga İvanovağa qarşı cinaiy iş açmağa çağırdı. Olar oña qarşı mahkemede iştirak etkenler.

İlmi Ümerov hatırlattı ki, mahkemede qabaat tarafı davada qayd etilgen intervyü tercimesinde Rusiye topraq bütünligini bozmaq çağıruvı olğanını isbatlaycaq «bir insannı bile şaat olaraq köstermedi».

Çarşenbe künü prokuror İlmi Ümerovğa 3 yıl ve 6 ay apis cezası şartlı olaraq berilmesini istedi. Onıñ 3 yıl müddetinen açıq faaliyetinen ve ocalıqnen oğraşması yasaqlana bile.

2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.


XS
SM
MD
LG