Kremlniñ nezaretindeki Aqmescit rayon mahkemesinde sentâbrniñ 20-nde, qırımtatar milliy areketiniñ yeyekçilerinden biri İlmi Umerovğa qarşı alıp barılğan mahkeme davasınıñ nevbetteki toplaşuvında eki tarafnıñ munaqaşaları başlanacaqtır. Bunı İlmi Umerov özü bildirdi.
Onıñsözlerine köre, mahkeme toplaşuvı çarşenbe künü saat 14:30 başlanacaq. Bu toplaşuvda İlmi Umerov soñ sözü ile hitap etmek te mümkün.
«Belki de, bügün bu davada soñki «Umerov çarşenbesi» olacaqtır. Soñra üküm çıqarılacaq. Eminim, prokuror ve mahkemeci, nasıl üküm çıqarılacağını ende bile, amma bu üküm – qabaatlayıcı üküm olacağından kimse şübelenmey», – dep yazdı İlmi Umerov Facebookta.
Keçende mahkemede qırımtatar tili mutehassısı Seitislâm Kişveyev sorğudan keçti. Onın soraştırılması içğn imaye tarafı israr etti. Kişveyev, İlmi Umerovnıñ qırımtatar tilinde yapqan nutuğını rus tiline yapılğan resmiy tercimesinde bir-çıq hata yapılğanını ayttı. O qayd etti ki, kendisi Rusiyeniñ topraq bütülgini bozmaq çağıruvlarını ve ekstremistik areketlerge yapılğan davetni Umerovnıñ nutuğında sezmedi.
2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
