Link açıqlığı

Sentâbrniñ 17-nde «Matbaacılar forumı» adlı 24 Lvov halqara edebiyat festivali çerçivesinde «Qırımtatarları: ilk Qurultaydan milliy muhtariyet ğayesine qadar» mevzusına bağışlanğan munaqaşa ötkerildi. Davet etilgen ekspertler Ukraina tamır halqı olğan qırımtatarlarına öz taqdirini belgileme aqqı tanılması kerek olğanı aqqında söz yürsetti.

Muzakerede qırımtatar halq Meclisiniñ yolbaşçısı Refat Çubarov, tarihçı Gülnara Bekirova, «KrımSOS» esasçılarından biri olğan Alim Aliyev, jurnalist Vitaliy Portnikov, tarihçı ve publitsist Yaroslav Gritsak iştirak etti.

«1917 senesi noyabr ayında teşkil etilgen qırımtatar halqınıñ Qurultayı tarihınıñ zemaneviy prizma üzerinden Ukraina Anayasasına Qırım Muhtar Cumhuriyetinen bağlı deñişmeler ve ilâveler kirsetüv meselesini muzakere etemiz», – dep yaza Çubarov Facebookta.

Bunıñ arfesine qırımtatar halqı Meclisiniñ reisi Refat Çubarov, Anayasa komissiyası sentâbr ayınıñ soñuna qadar Ukraina esas qanunına Qırım Muhtar Cumhuriyeti statısınen bağlı tedarik etken ilk azırlık, deñişme ve ilâvelernen bağlı tekliflerini taqdim etecegi aqqında bildirgen edi.

2014 senesi martnıñ 20-nde Yuqarı Rada qırımtatarlarnı Qırımnıñ tamır halqı dep tanığan edi. Bu qararğa 283 deputat qoltutqan edi. Ukraina qırımtatarlarnıñ tamır halqı olaraq etnik, medeniyet, til ve din hususiyetleriniñ saqlap qalması ve inkişaf etmesine kefil olacağına vade etti.

XS
SM
MD
LG