İşğal etilgen Qırımnıñ poligonlarından birinde Rusiye Qara deñiz flotunıñ motoatıcıları ile birlikte keñiş miqyaslı batalyon taktika talimleri ötkerilgen. Bunı sentâbrniñ 15-nde Rusiyeniñ Cenübiy arbiy okrugınıñ matbuat hızmeti haber ete.
«Motoatıcı ve tankçılar birliginiñ taktikiy avuşma areketleri şart etilgen duşman tarafından himiya silâsı ve radio elektron kureşniñ aletleri qullanılğanı kibi ötkerildi. Uruş meydanında müendislik ve minatemizleme bölükleri çalıştı, olar minalı alanlarda keçitler açtı ve yañı ateş noqtalarınıñ müendislik donatuvınen oğraştı», ― dep buyurıla bildirüvde.
İstihbarat bolükleriniñ erkânında «Orlan-10» pilotsız uçqan cihaz komleksleriniñ mutehasısları çalışqan. Olarnıñ yardımınen alınğan malümat şart etilgen duşmannıñ bulunğan yerlerini bildire edi ve «Sani» minaatıcı ve «Msta-B» haubitze batareyalarınıñ atışları içün qullanıla edi.
Bundan evel Ukraina Esas Ştabı işğal etilgen Qırımda Rusiye tarafından ötkerilgen arbiy talimlerni qanunsız olaraq tanıtqan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
