Advokat Emil Kürbedinov halqara toplulıq işğal etilgen Qırımdaki «nizamsızlıq», şu cümleden küç idareleri tarafından qırımlı Renat Paralamovnıñ qaçırılması ve köteklenmesi aqqında bilmeli, dep ayttı.
«Halqara toplulıq Qırımda olğanlarnı bilip bizni eşiter, dep ümüt etemiz. Birleşken Milletlerniñ azaplarğa qarşı komitetine ariza berecek olamız», – dedi Kürbedinov Qırım.Aqiqatqa.
Sentâbrniñ 13-de maskay kiygen ve urbasında kim ekenligi belgisiz olğan şahıslar tarafından belli olmağan tarafqa alıp ketirilgen qırımlı Renat Paralamov sentâbrniñ 14-de soy-soplarınen bağlandı. O, Aqmescit avtovokzalında tapıldı.
Paralamovnıñ Qırım.Aqiqatqa tarif etkenine köre, «belgisiz şahıslar başına çuval kiydirip, oña toknen azap çektirgenler».
Sentâbrniñ 13-de saba Qırımnıñ Seitler qasabasında yaşağan qırımlı Renat Paralamovnıñ evinde küç idaresiniñ hadimleri «tedqiqat ve taqiqat areketleri» dep adlandırğan tintüv ötkergen edi. Advokat Emil Kurbedinovnıñ tahminlerine köre, «teşkerüv» Paralamovnıñ diniy saadaki faalliyetinen bağlıdır. Şaatlarnıñ aytqanlarına köre, maska kiygen ve urbasından kim ekenligi belgisiz olğan şahıslar Parlamovnı belli olmağan tarafqa alıp ketken. Keççe belli olğanı kibi, olar onıñ kitap ve notebookını çekip alğanlar.
Qırımdaki rusiyeli küç idarfeleri mesele boyunca resmiy izaat bermegen edi.
Ukraina Tışqı işler nazirligi Rusiyeni qırımtatarlarnıñ repressiya ve ayırımını toqtatmasına çağırdı.
Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbaplarını sorğulay, qırımtatar vatandaşları tutup ala. Uquq qorçalayıcılar bunı «farqlı tüşüngenlerge qarşı küreş» dep tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
