Avropa birligi Şurası sentâbrniñ 14-nde Ukrainanıñ topraq bütünligi ve mustaqilligine alâqadar olğan Rusiyenin 149 vatandaşı, separatistleri ve 38 şirketine qarşı kirsetilgen sanktsiyalarnı uzattı.
Vesiqada aytılğanı kibi, sanktsiyalar 2018 senesi martnıñ 15-ne qadar uzatılmaqta.
Sıñırlama tedbirleri viza sıñırlaması ve esaplarınıñ dondurulmasınen bağlı.
Qarar sentâbrniñ 15-nde AB Resmiy mecmuasında derc etilgen soñ küçke kirecek.
Sentâbrniñ 6-nda Avropa birliginiñ elçileri Ukrainanıñ mustaqilligine telüke teşkil etken Rusiyege qarşı kirsetilgen sanktsiyalarnı yarım yılğa uzatmağa qarar berdi.
Sıñırlama tedbirleri Ukrainadaki buhran sebebinden Avropa birliginiñ reaktsiyası sıfatında 2014 senesi mart ayında kirsetilgen edi.
Ondan da ğayrı, rusiyeli ve işğal altındaki Qırımdaki şahıs ve şirketlerge, donbasslı ve qırımlı separatist ve sabıq ukrain ükümeti temsilcilerine, bundan da ğayrı Rusiye iqtisadiyatınıñ bazı dallarına qarşı ayrıca uzatılğan bir qaç paket sanktsiyalar kirsetilgen edi.
Buña beñzer sanksiyalarnı ayrıca ABD ve «Yediler gruppası»na kirgen devletlernen diger bazı devletler de kirsetken edi.
