Link açıqlığı

Saatnıñ esas haberi

Sentâbrniñ 14-de Bağçasarayda «Qırım birdemligi» birleşmesiniñ faalleri «Qırım marafonı» aktsiyası çerçivesinde Zarema Ümerovanıñ para cezasını ödedi. O, Facebookta Ukrainağa qoltutuv yazuvları içün Rusiye Ceza kodeksiniñ 282-nci maddesi boyunca 300 biñ ruble (tahminen 130 biñ grivna – QA) para cezası alğan edi. Bu aqta Qırım.Aqiqat mühbiri haber ete.

Sabadan faaller işğal etilgen Qırımnıñ Bağçasaray rayonı mahkeme vekilleriniñ bölügi yerleşken bina yanında toplaştı.

«Bizler birinci para cezasını ödemek içün Bağçasaray hazine idaresiniñ binasına keldik. Kapik-kapik ketirgen üç yüz biñ rublemiz – tahminen 135 kilogrammdır. Bu paket ve qopqalarğa baqıp, er bir kapik bir insandan kelgenini añlap quvanasıñ. Böylece, bu bir insannıñ problemi degil, bütün halqnıñ problemi olğanını kösterdik», – dep ayttı faal Dilâver Memetov Qırım.Aqiqat mühbirine.

Faallerniñ bir qısmı mahkeme vekilinen beraber kapiklerni saymağa başladı. O, para cezası on rublelik kapiklernen ödenilecegine raat baqıp, bankta «kapiklerni sayğan maşina» barmı-yoqmı bilmege tırıştı. Soñra mahkeme vekilleri ve faaller kapiklerni özleri saymağa başladı.

Memetovnıñ aytqanına köre, eñ yaqın künleri faaller daa bir para cezasını ödeycek.

İyülniñ 31-de işğal etilgen Qırımda «Qırım birdemligi» «Qırım marafonı» adı altında para toplamağa başladı. Böylece, faaller siyasiy mabüs ve faallerge yardım etecek olalar. Avgustnıñ 22-ne qadar faaller 820 biñ ruble (tahminen 352 biñ grivna) topladı. Teşkilâtçılar aktsiyanı devam ettirecek ola.

Aktsiya devamında para 10 rublelik kapik şeklinde toplandı. Böylece, «lâqayt qalmağanlarnıñ birligi» kösterildi.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG