Sentâbrniñ 13, çarşenbe künü, Qırımnıñ Seitler qasabasında yaşağan Renat Paralamovnıñ evinde küç idaresiniñ hadimleri «tedqiqat ve taqiqat areketleri» dep adlandırğan tintüv ötkerildi. Bu aqta Facebook saifesinde yerli faaller bildirmekte.
Advokat Emil Kurbedinov Qırım.Aqiqatqa bildirgeni kibi, al-azırda rusiyeli küç idaresiniñ hadimleri Paralamovnı tahminen Aqmescitte yerleşken Rusiyeniñ Qırımdaki FSBsına alıp ketken.
Faaller bildirgenine köre, Paralamov – musulman, onıñ kiçik yaşta olğan dört balası bar, bazarda çalışaraq kün köre eken. Bu adam daa evel asla mahküm etilmegen.
Qırım.Aqiqat vaqianıñ ketişatını taqip etmege devam etmekte. Rusiyeli küç strukturaları meselenen bağlı daa iç bir türlü izaat bermedi.
Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbaplarını sorğulay, qırımtatar vatandaşları tutıp ala. Uquq qorçalayıcılar bunı «farqlı tüşüngenlerge qarşı küreş» dep tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
