Kreml nezareti altındaki Qırım yolbaşçısı Sergey Aksönov Yedi-Quyu (Leninskiy) rayonı memuriyetiniñ rusiyeli yolbaşçısı Aleksandr Maçusskiyniñ istifasını «Tavrida» trassası ve Keriç köpüriniñ qurulıcılığınen bağladı. Bu aqta Aksönov sentâbrniñ 12-nde Facebookta yazmaqta.
«Bügünki künde rayon yolbaşçılığına farqlı bir şekilde yanaşmalı ve bu ilk-evelâ Keriç köpüri ve «Tavrida» federal trassası bağlı şekilde yapılmalı. Bu - idare strukturalarınıñ işi teşkil etilgende tesirli deñişmeler kirsetilmesinen bir arada, region seviyesindeki yatırım siyaseti olaraq yapılmalı», – dep yaza Aksönov.
Sentâbrniñ 12-nde Kreml nezareti altındaki Qırım yolbaşçısı Sergey Aksönov Yedi-Quyu (Leninskiy) rayonı memuriyetiniñ rusiyeli yolbaşçısı Aleksandr Maçusskiyniñ istifası aqqında ilân etti.
Rusiye nezaretindeki Qırım akimiyetinde avgustnıñ 27-nde bazı istifalar yapıldı. Qırımnıñ al-azırdaki yolbaşçısı Segey Aksönov Canköy, İslâm-Terek, Qurman rayonlarınıñ yolbaşçılarınen beraber, Kefe şeer yolbaşçısı ve şeer şurasınıñ yolbaşçıları istifa etecekleri aqqında aytqan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
