Link açıqlığı

Stokgolmde uquq qorçalayıcılar Qırımda ukrainler taqip etilgeni aqqında ikâye etti


Stokgolmde keçken «Rusiye işğali altındaki Qırım ve Donbassta insan aqları» tögerek masa çerçivesinde ukrain uquq qorçalayıcıları Kreml nezaretindeki yerli akimiyet işğal altındaki Qırımda taqip etilgen ukrainler aqqında ikâye etip berdi.

Bu aqta sentâbrniñ 12-nde Qırım uquq qorçalayıcı gruppası bildirmekte.

«Baluh – Qırımda ukrain faalleriniñ taqip etilgenini köstergen açıq-aydın, amma yekâne olmağan bir misaldir. Ukrain faalleri Ukrainanen bağlı faaliyetleri içün memuriy ve cinaiy davalar vastasınen taqip etilmekte; olar qorquzılıp Qırımnı terk etmege mecbur etile.Bir de olarnıñ er angi bir toplaşuv keçirmesi de yasaq. Yaqında Ukrain medeniy merkeziniñ lideri Leonid Kuzmin Qırımnı terk etmege mecbur qaldı», – dedi Qırım uquq qarçalayıcı gruppasınıñ yolbaşçısı Olga Skripnik.

Sentâbrniñ 11-nde Stokgolmde uquq qorçalayıcılar işveçli diplomatlarğa Qırımda insaniyetlikke qarşı yapılğan cinayetler aqqında ikâye etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG