Kreml nezareti altındaki Qırım yolbaşçısı Sergey Aksönov Yedi-Quyu (Leninskiy) rayonı memuriyetiniñ rusiyeli yolbaşçısı Aleksandr Maçusskiyniñ istifası aqqında ilân etti. Bu aqta sentâbrniñ 12-nde akimiyet tarafdarı olğan «Krıminform» saytı bildirmekte.
«Bügün Yedi-Quyu rayonı yolbaşçısınıñ istifasınen bağlı qarar qabul etilecek. O, ariza yazacaq, çünkü rayonnıñ inkişafı, devlet akimiyeti organlarınıñ işi, tabir caiz ise, asla tatmin etecek derecede degil», – dep ayttı Aksönov Qırımnıñ rusiyeli parlamenti prezidiumınıñ toplaşuvında.
Aleksandr Maçusskiy Kreml nezarenindeki Yedi-Quyu rayon memuriyetine 2014 senesi oktâbr ayından berli reberlik yapa edi.
Rusiye nezaretindeki Qırım akimiyetinde avgustnıñ 27-nde bazı istifalar yapıldı. Qırımnıñ al-azırdaki yolbaşçısı Segey Aksönov Canköy, İslâm-Terek, Qurman rayonlarınıñ yolbaşçılarınen beraber, Kefe şeer yolbaşçısı ve şeer şurasınıñ yolbaşçıları istifa etecekleri aqqında aytqan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
