Ukraina baş naziri Vladimir Groysman Ukraina ükümetiniñ işğal etilgen Qırımda mahküm etilgen qırımtatar liderlerinden biri Ahtem Çiygoznıñ azat etilmesi içün küreşmege azır olğanını qayd etti.
«Ahtem Çiygozğa qarşı müthiş bir üküm çıqarıldı. İmayecilerinen beraber qanunsız alda mahküm etilgen Ukraina vatandaşınıñ azat etilmesi içün küreşecekmiz», – dep yazdı Vladimir Groysman Twitterde sentâbrniñ 11-de.
Kremlge tabi olğan işğal etilgen Qırımnıñ Yuqarı mahkemesi qırımtatar halqınıñ liderlerinden biri Ahtem Çiygozğa 8 yıl sert rejimli apis cezasını berdi, dep bildire Qırım.Aqiqat mühbiri.
Ukraina prezidenti Petro Poroşenko sentâbrniñ 11-de işğal etilgen Qırımda ükmü çıqarılğan qırımtatarlarnıñ liderlerinden biri Ahtem Çiygoznıñ davasını «Birleşken Milletler tarafından işğalci olaraq tanılğan Rusiye içün daa bir üküm» olaraq adlandırdı.
Ukraina Tışqı işler nazirligi işğal etilgen Qırımda mahküm etilgen Ahtem Çiygoznıñ azat etilmesini talap etecek ola.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
