Link açıqlığı

Poroşenko: Çiygoznıñ davası Rusiye içün daa bir üküm olacaqtır


Ukraina prezidenti Petro Poroşenko sentâbrniñ 11-de işğal etilgen Qırımda ükmü çıqarılğan qırımtatarlarnıñ liderlerinden biri Ahtem Çiygoznıñ davasını «Birleşken Milletler tarafından işğalci olaraq tanılğan Rusiye içün daa bir üküm» olaraq adlandırdı.

Bunı Poroşenko Facebookta yazdı.

«Ahtem Çiygoznıñ davası – Rusiye içün daa bir üküm, o, eñ yüksek halqara seviyede – Birleşken Milletlerde – işğalci olaraq tanıldı. Qanunsız bir alda azatlıqtan marum etmege mümkün, lâkin azatlıq ve kerçek yeñilmez! Başqasınıñ toprağını işğal etmege mümkün, lâkin ayaqlarıñız altında yanacaq ve azat etilgence yaqacaq», – dep qayd etti Ukraina prezidenti.

Kremlge tabi olğan işğal etilgen Qırımnıñ Yuqarı mahkemesi qırımtatar halqınıñ liderlerinden biri Ahtem Çiygozğa 8 yıl sert rejimli apis cezasını berdi, dep bildire Qırım.Aqiqat mühbiri.

Böyle bir qararnı mahkeme sentâbrniñ 11-de ilân etti.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG