Link açıqlığı

Qırımtatar halqı liderlerinden biri Ahtem Çiygoznıñ imayesi işğal etilgen Qırımnıñ Kremlge tabi olğan Yuqarı mahkemesiniñ 8 yıl apis cezası qararından şikâyet etecek ola. Bu aqta Çiygoznıñ advokatı Nikolay Polozov mahkeme binası yanında toplaşqan insanlarğa ayttı.

Polozovnıñ qayd etkenine köre, Rusiye mahkemesi Ahtem Çiygoznı Ukraina vatandaşı olaraq tanıdı.

Advokatnıñ aytqanına köre, imaye Ukraina ükümetinen beraber Çiygoznıñ azat etilmesini talap etecek.

«Ahtem Çiygozğa qarşı üküm – bütün qırımtatar halqına qarşı bir ükümdir. Er biriñiz bugün 8 yıl apis cezası aldı», – dep qayd etti Polozov.

Polozov sözge çıqqan soñ insanlar «Ahtem, biz yanındamız!» degen şiarlarnı seslendirgenler.

Kremlge tabi olğan Qırım Yuqarı mahkemesi qırımtatar halqınıñ liderlerinden biri Ahtem Çiygoznı 8 yılğa azatlıqtan marum etti.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG