Link açıqlığı

Çubarov: Çiygozğa qarşı çıqarılğan ükümniñ maqsadı – Qırımda bütün qırımtatarlarnı «ezip çıqmaqtır»


Rusiye akimiyeti qırımtatar halqınıñ liderlerinden biri Ahtem Çiygoznı 8 yılğa apiske alıp, işğal etilgen Qırımda «bütün qırımtatarlarnı ezip çıqacaq ola». Böyle bir fikirni Qırımtatar Milliy Meclisiniñ reisi, Ukraina halq deputatı Refat Çubarov sentâbrniñ 11-de Qırım.Aqiqatqa bildirdi.

«Maalesef, üküm sert olacağını er kes bile edi. Bizler epimiz, şu cümleden Ahtem Çiygoz, üküm qanunsız, adaletsiz olğanını bilemiz. Böylece, bütün qırımtatarlarnı ezip çıqacaq olalar. Ahtem Çiygoznı qorquzmağa istemeyler. Qırımtatar halqına qarşı areket eteler», – dedi Çubarov.

Onıñ aytqanına köre, işğal etilgen Qırımda Ahtem Çiygozğa qarşı yapılğan qanunsız areketler «Avropa insan aqları mahkemesine bu qanunsız areketlerni lâğu etmege imkân berir».

Sentâbrniñ 11-de Kremlge tabi olğan Qırım Yuqarı mahkemesi qırımtatar halqınıñ liderlerinden biri Ahtem Çiygoznı 8 yılğa azatlıqtan marum etti.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG