Kremlge tabi olğan Aqmescit rayon mahkemesi qırımtatar milliy areket yetekçilerinden biri İlmi Umerovnıñ davası çerçivesinde nevbetteki toplaşuvnı kelecek çarşenbe kününe, avgustnıñ 13-ne qaldırdı. Toplaşuvda Umerovnıñ özü sorğudan keçirilecektir.
Mahkemeci sentâbrniñ 8-ne tain etilgen toplaşuvda İlmi Umerovnı soraştıracaq edi, lâkin mahkümniñ dört imayecisinden üçü mevcut olmağanları sebebinden sorğunı başqa künge qaldırdı. O qayd etti ki, imayeciler sorğudan soñra birden munaqaşalarğa azır olmaq kerek, dep bildirdi Ayşe Umerova Qırım.Aqiqatqa.
«Umerov davası» esnasında sentâbrniñ 8-nde ötkerilgen toplaşuvda mahkeme, imaye tarafınıñ muracaatını red etip, İlmi Umerovnıñ nutuğını tekrar lisaniy ekspertizadan keçirmege razı olmağan.
2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
