İşğal etilgen Qırımda Kremlge tabi olğan qadılar «fevral 26 davası» ve qırımtatar halqınıñ liderlerinden biri İlmi Umerovnıñ davası boyunca mahkeme oturışlarını sentâbrniñ 7-ne saat 14:00 belgiledi.
Eki oturışta da qabaatlanğanlarnıñ menfaatlarını qorçalağan qırımlı advokat Edem Semedlâyevniñ Qırım.Aqiqatqa bildirgenine köre, o, bir mahkemeni başqa künge qaldırmağa rica etecek ola.
«Bunı şimdi bildim. «Fevral 26» davasınıñ oturışı 14-ke belgilengen eken. Başqa künge avuştırmalarını rica etecekmiz», – dedi Semedlâyev.
Onıñ aytqanına köre, Rusiye prokuraturası «fevral 26 davasınen» bağlı qabaatlayıcı qararnı tasdıqlamalı. Azır olsa, onı mahküm etilgenlerge kösterip, azırlanmaq içün vaqıt berecekler.
Sentâbrniñ 5-de Kremlge tabi olğan Aqmescit Merkeziy rayon mahkemesi «fevral 26 davasınıñ» oturışını üçünci kere başqa künge avuştırdı.
Kreml kontrol etken Aqmescit Merkeziy rayon mahkemesi iyülniñ 20-de «fevral 26 davasınıñ» mabüsleri Ali Asanov ve Mustafa Degermenciniñ ev apsinde bulunma müddetini oktâbrniñ 7-ne qadar uzattı.
«Fevral 26 davasınıñ» mabüsleri Mustafa Degermenci ve Ali Asanov aprelniñ 6-dan berli ev apsinde bulunalar. Bundan evel ise Aqmescit SİZOsında yatqan ediler.
2015 senesi yarımadada qırımtatar faallerini 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni içün mahküm etmege başladılar. Olarnı qalabalıqlarda iştirak etkeninde qabaatlaylar.
Soñra mahkeme «fevral 26 davasını» ekige böldi: Qırımtatar Milliy Meclisiniñ reis muavini sıfatındaki Ahtem Çiygozniñ davası olaraq ve ayrıca esnasnıñ diger iştirakçileri olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev davası şeklinde.
