Ukraina topraq bütünliginiñ ğayrıdan tiklenmesi içün Rusiyege qarşı sanktsiyalar quvetleştirilmeli. Bu aqta qırımtatar halqınıñ lideri Mustafa Cemilev Qırım.Aqiqatqa bildirdi.
«Sanktsiyalarnı toqtatmaq ve yımşatmaq içün sebep yoq, amma bizler onıñ quvetleştirilmesini isteymiz. Mence, sanktsiyalar bu seviyede devam etse – Qırım azat etilir ve Ukraina topraq bütünligi ğayrıdan tiklenir. Rusiye teşviqatı ne aytsa aytsın, sanktsiyalarnıñ büyük emiyeti bar», – dedi Cemilev.
Bundan evel Ukraina prezidenti Petro Poroşenko Avropa Birliginiñ sanktsiyaları uzatılmasına qoltutqan edi.
Avropa Birliginiñ elçileri sentâbrniñ 6-da Ukraina mustaqilligi içün telükeli olğan Rusiye şirketleri ve memurlarına qarşı sanktsiyalarnı uzatmağa razı oldı.
Şimdi bu qarar Avropa Birliginiñ Şurası tarafından tasdıqlanmalı.
Martnıñ 13-de Avropa birliginiñ şurası Ukrainanıñ topraq bütünligi, devlet sıñırları ve mustaqilligi içün telüke olğanından Avropa Birligi kirsetken sanktsiyalarnı yarım yılğa uzatqan edi. Bu sanktsiyalar 2017 senesi sentâbrniñ 15-ne qadar devam ete, olar 150 şahıs ve 37 teşkilâtnıñ sermiyasını buzlata ve Avropa Birligine kirişini yasaq ete.
Avropa Birligi Ukrainadaki buhranğa cevap olaraq sanktsiyalarnı 2014 senesi mart ayında kirsetken edi. Rusiyege qarşı sanktsiyalar ABD tarafından da kirsetilgen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
