Qırımtatar halqı Qırımda apiske alınğan Ahtem Çiygoznıñ ükmü sentâbrniñ 11-de işğal etilgen yarımadanıñ Yuqarı mahkemesinde seslendirilgende oña qoltutacaq. Advokat Nikolay Polozov bundan emindir. O, semetdeşlerniñ bu yardımı siyasiy mabüs içün müim olğanını aytıp, oña Rusiye akimiyetiniñ qanunsız areketlerinen küreşmege yardım etkenini qayd etti. Bu aqta Polozov sentâbrniñ 5-de Facebookta yazdı.
«Eminim ki, yüreginde azatlıq olğan, Rusiye akimiyetiniñ basqısına baqmadan, printsiplerinden vazgeçmegen, qaçıruv, öldürüv, uydurılğan davalar, çoq biñli para cezalarından soñ qorqmağan er bir insan Ahtem Çiygoznıñ ükmü seslendirilgende oña qoltutmağa çıqar. Eminim ki, bütün qırımtatar halqı Ahtem Çiygozğa qoltutar», – dep yazdı Polozov.
Onıñ aytqanına köre, üküm çıqarılmasına az qalsa da, Ahtem Çiygoznıñ közlerinde «qorqu, şübe ya da eminsizlik kölgesi» yoq. Bütün qıyınlıqlar, şu cümleden anasınıñ ölümi, «qırımtatar halqınıñ cesür liderini daa ziyade quvetleştirdi».
Kremlge tabi olğan Qırım Yuqarı mahkemesi qırımtatar milliy areketiniñ yetekçilerinden biri Ahtem Çiygozğa nisbeten mahkeme qararını sentâbrniñ 11-nde ilân etecek.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
