Link açıqlığı

Qırımda Myanma musulmanları içün yardım toplanması ilân etildi


Rohinca qaçaqları Bangladeşteki qaçaqlar lagerinde aş yardımını bekley, 2017 senesi avgustnıñ 30

Qırım ve Aqyar musulmanları diniy idaresi işğal altındaki yarımadada Myanmadaki rohinca musulmanları içün para toplamağa başladı.

«Qırım müftiligi Qırım sakinleri ve musafirlerini Myanma musulmanlarınıñ belâsına lâqayt olmayıp, olarğa samimiy duanen beraber maddiy yardım köstermege de çağıra. Rohinca musulmanlarına yardım bu adres boyunca berile bile: Aqmescit şeeri, Kurçatov soq., 4 (Kebir Cami) ya da Qırım regionlarındaki rayon ve yerli imamlar üzerinden. Sermiya qaçaqlarnıñ lagerlerine yollanacaq», – dep aytıla müftilikniñ saytında.

Bundan evel Qırım advokatı Cemil Temişev Myanmadaki adiselernen bağlı mitingni Aqmescitte keçirmek içün ariza berecegini haber etken edi.

Sentâbrniñ 4-de Kyivde Ukraina Tışqı işler nazirliginiñ binası yanında Myanma musulmanlarına qoltutuv aktsiyası olıp keçti. İştirakçiler, şu cümleden qırımlı faaller, «Genotsid toqtatılsın» ve «Terror toqtatılsın», dep qıçıra ediler.

QAMDİ 2014 senesi Qırım Rusiye tarafından işğal etilgen soñ yapacaq areketlerini Meclis ile muzakere etmey. Yanvarniñ 16-17-de Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı. 2016 senesi noyabrniñ 19-da 14 qırımtatar din cemiyeti Kyivde toplaşıp, müftiylikni qurdılar.

Musulman olğan rohinca halqınıñ 73 biñden ziyade vekili zorbalıq sebebinden Myanmadan qomşu Bangladeşke qaçtı, dep bildirdi Birleşken Milletlerniñ qaçaqlar işleri yuqarı komissarınıñ idaresi.

Regionda 2012 senesinden berli qanlı çatışmalar ara-sıra yüz bere. İlk sefer kütleviy zıddiyet olğanda 100 biñ rohinca memleket içinde köçip kelgenlerniñ lagerlerine qaçtı.

XS
SM
MD
LG