Link açıqlığı

Saatnıñ esas haberi

Qırım Muhtar Cumhuriyetiniñ prokurorı ve Frenkistan elçihanesiniñ vekilleri Avropa Birliginiñ Qırım sanktsiyalarını muzakere ettiler


Qırım Muhtar Cumhuriyetiniñ prokurorı Günduz Mamedov Ukrainadaki Frenkistan Elçihanesiniñ vekillerinen, şu cümleden Kristof Le Rigolor ile körüşip, Avropa Birliginiñ Qırım işğali sebebinden kirsetken sanktsiyalarını muzakere etti. Bu aqta ukrain prokuraturasınıñ matbuat hızmeti sentâbrniñ 5-de haber ete.

Berilgen malümatqa köre, körüşüv iştirakçileri Ukraina topraq bütünligine qoltutqanını bildirip, Avropa Birligi kirsetken sanktsiyalarnıñ talaplarına riayet etilmesi ve qayd etilgen meselelerde işbirligi aqqında laf ettiler.

QMC prokurorı vaqtınca işğal etilgen topraqlarğa kiriş nizamınıñ bozulmasını ayrıca qayd etti.

«Bizim vazifemiz – Avropa sanktsiyaları rejimine riayet etilmemesini qayd etmeknen beraber yarımadada milliy qanunlarnıñ bozulmasını qayd etmektir», – dep ayttı Günduz Mamedov.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG