İşğal etilgen Qırımnıñ Aqmescit rayonında sentâbrniñ 5-de «N.A.Semaşko Qırım klinik hastahanesiniñ» çoq profilli tibbiy merkezi qurulmağa başladı. Bu aqta Kremlge tabi olğan Qırım ükümetiniñ matbuat hızmeti bildire.
63 biñ metr kârelik merkez 250 yerlik hastahane, 41 yerlik 16 bölük ve umumen 734 hasta yerinden ibaret olacaqtır.
«Obyekt FTSPge (işğal etilgen Qırım ve Aqyarnıñ inkişaf programması – QA) kire, onıñ fiyatı leyha ve qurucı işlerinen beraber 9 mlrd ruble (tahminen 4 mlrd grn – QA) teşkil ete», – dep ayttı Qırımnıñ Rusiye yolbaşçısı Sergey Aksenov.
Onıñ bildirgenine köre, merkez qurucılığını 2019 senesi dekabr ayına qadar yekünlemege planlaştırıla.
2017 senesi fevral ayınıñ başında Qırımda ekimler az olğanı bildirildi. Kremlge tabi olğan Qırım felâket tibbiyeti ve acele tibbiy yardım merkeziniñ müdiri Sergey Astankin «acele yardımğa» biñ insan yetmegenini aytqan edi.
Ekimlerniñ az olması Qırımdaki aylıqlarnen bağlı ola bile.
