Kremlge tabi olğan Aqmescit Merkeziy rayon mahkemesi sentâbrniñ 5-ne keçirilmesi planlaştırılğan «fevral 26 davasınıñ» oturışını belli olmağan müddetke qaldırdı. Qırımlı advokat Edem Semedlâyevniñ Qırım.Aqiqatqa bildirgenine köre, qadı diger esnasta meşğul.
«Prokuratura qabaatlayıcı qararnı bilip, imaye tarafınıñ delillerini taqdim etecek», – dep ayttı Semedlâyev.
Bundan evel mahkeme prokuror tatilde olğanı içün oturışnı sentâbrniñ 5-ne avuştırğan edi. Avgustnıñ 18-de Kremlge tabi olğan Aqmescit Merkeziy rayon mahkemesi oturışnı avgustnıñ 24-ne avuştırğan edi. Sebebi – qabaatlayıcı taraf oturışqa azırlanıp olamadı.
Kreml kontrol etken Aqmescit Merkeziy rayon mahkemesi iyülniñ 20-de «fevral 26 davasınıñ» mabüsleri Ali Asanov ve Mustafa Degermenciniñ ev apsinde bulunma müddetini oktâbrniñ 7-ne qadar uzattı.
«Fevral 26 davasınıñ» mabüsleri Mustafa Degermenci ve Ali Asanov aprelniñ 6-dan berli ev apsinde bulunalar. Bundan evel ise Aqmescit SİZOsında yatqan ediler.
2015 senesi yarımadada qırımtatar faallerini 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni içün mahküm etmege başladılar. Olarnı qalabalıqlarda iştirak etkeninde qabaatlaylar.
Soñra mahkeme «fevral 26 davasını» ekige böldi: Qırımtatar Milliy Meclisiniñ reis muavini sıfatındaki Ahtem Çiygozniñ davası olaraq ve ayrıca esnasnıñ diger iştirakçileri olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev davası şeklinde.
