Musulman olğan rohinca halqınıñ 73 biñden ziyade vekili zorbalıq sebebinden Myanmadan qomşu Bangladeşke qaçtı, dep bildirdi Birleşken Milletlerniñ qaçaqlar işleri yuqarı komissarınıñ idaresi.
İdareniñ matbuat kâtibi Viviyan Tan qayd etkenine köre, avgustnıñ 25-de Myanma ğarbindeki Rakhayn ştatında başlağan zorbalıq olarnı qaçmağa mecbur etti.
Myanma uquq qoruyıcıları ve rohinca halqınıñ vekilleri biri-birini zalımlıqta qabaatlay.
Myanma arbiyleriniñ malümatına köre, soñki künleri yüz bergen çatışmalarda aman-aman 400 insan elâk oldı. Çoqusı – rohinca cenkâverleridir.
Qaçaqlar ise Myanma askerleri ve diger etnik gruppalarnıñ temsilcileri (esasen büddistler) musulmanlarğa ücüm etip, olarnıñ evlerini yaqa ve Rakhayn ştatından quva ediler.
Amerika Birleşken Devletlerindeki Human Rights Watch uquq qorçalayıcı teşkilâtı rohinca köylerinden birinde 700 evniñ yaqılğanını aks etken resimni aydınlattı.
Regionda 2012 senesinden berli qanlı çatışmalar ara-sıra yüz bere. İlk sefer kütleviy zıddiyet olğanda 100 biñ rohinca memleket içinde köçip kelgenlerniñ lagerlerine qaçtı.
Rohinca halqınıñ ekseriyeti musulmandır. Mütehassıslarnıñ malümatına köre, Bangladeş devletiniñ topraqlarından çıqqan bengalli musulmanlar etnik gruppalarınıñ nesillerinden biri olalar. Olar soñki asırlar devamında Rakhaynda yerleşe ekenler. Olarnıñ tili bengal şivelerinden biri olaraq tanılmaqta. Rohincalar ise eskiden Arakan olaraq belli Rakhaynnıñ tamır sakinleri olğanını aytalar. Ğarpta Birma olaraq belli olğan Myanmanıñ eski arbiy rejimleri rohincalarnı vatandaşlıqsız qaldırıp, olarnı icret etmege mecbur etmege tırışqan ediler.
