İşğal etilgen Qırımda CANLI RADİO yañı qırımtatar radiosı açıldı. Bu aqta jurnalist Naciye Femi Facebookta bildirdi.
Onıñ aytqanına köre, radioda qırımtatar muzıkası yanğıraycaq: «tek folklor degil, rok-n-roll, pank-rok, trans ve neoklassika olacaq». Saytta muzıka haberleri ve rusça maqalelerni oqumağa mümkün. Lâkin yaqın vaqıtta qırımtatarca ve inglizce saifeleri olacağını da vade eteler.
«Biz çoq deñeme yapacaqmız. Farqlı olacaqmız. Siznen içtimaiy ağlar üzerinden ve canlı subetleşecekmiz, küçük ve büyük tedbirler yapacaqmız. İlerilep, adetlerni unutmaycaqmız. Tilniñ saqlap qalması, medeniyet ve muzıkanıñ inkişafı içün bizler de qasevetlenemiz. Bizni birleştirecek yollarnı beraber qıdıracaqmız», – dep yazdı Femi.
Jurnalistniñ aytqanına köre, radio eki aftada açıldı.
2015 senesi aprelniñ 22-de Kreml tarafından tayin etilgen Qırım yolbaşçısı Sergey Aksönovnıñ fermanı ile kâr qazanmağan «Qırımtatar cemaat teleradiokompaniyası» qurulğan edi, onıñ adı «Millet» ve «Vetan sedası» radiosı oldı. Avgustnıñ 28-de Roskomnadzor bu teşkilâtqa yayın yapması içün litsenziya berdi. 2015 senesi sentâbrniñ 1-de «Millet» telekanalı deñeme şeklinde yayınlarını başlatqan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
