Link açıqlığı

Qırımda memurlarnıñ emri ile qırımtatar mektebiniñ araba qapusından tamğa kesip atıldı – jurnalist


İşğal etilgen Qırımdaki İçki rayonınıñ 3-ünci nomeralı mektepniñ araba qapusından sentâbrniñ 1-i arfesinde qırımtatar tamğası alıp taşlandı. Bunı jurnalist Mavile Abkerimova Feysbukta bildirip, mektepniñ araba qapusı ile fotoresimni derc etti.

«Belli olğanı kibi, mektep akimiyetniñ qararına uymağa mecbur oldı. İşbu qararğa köre, «araba qapuda milliy timsaller olmamalı». Tamğa mektepniñ araba qapusında oquv yılınıñ başlağanına qadar bar edi. Bugün, sentâbrniñ 1-de, talebeler mektep azbarına kirgende onıñ yerine boşluq köre ediler. Yazıq...», – dep qayd etti Abkerimova.

Avgust ayınıñ soñunda Qırım faali Edem Dudakov Kremlge tabi olğan İçki rayonınıñ tasil bölügi yolbaşçısı sentâbrniñ 1-ne qadar qırımtatar mektebiniñ araba qapusından tamğanı alıp taşlamağa talap etti, dep bildirgen edi.

Mektep reberleri ya da Rusiye akimiyeti izaat bermey.

Qırım Rusiye kontroline keçken soñ qırımtatarlar aq-uquqları bozulğanı bir çoq kerek bildirgen ediler. Qırımnıñ Rusiye akimiyeti ise bütün halqlarnıñ aqları aynı seviyede temin etilgen, dep israr ete.

İyül ayında qırımtatar faali Riza Asanov Qarasuvbazar rayonınıñ akimiyetini «qırımtatarlar ayırımğa oğratılğanına diqqat etmege» çağırdı. O, qırımtatar mektebine qatnağan balalarnıñ rastkelgen problemlerini aydınlatqan edi. Böylece, mektep «milliy» statusından marum qaldı, tamir işleri keçirilmedi, mektep avtobusı balalarnı köyden mektepke qadar derslerge bir buçuq saat qalğanda ketire eken.

Ukraina uquq qorçalayıcılarınıñ bildirgenine köre, al-azırda qırımtatarca laf etken balalarnıñ ancaq üçte biri ve ukraince bilgen balalarnıñ altıda biri işğal etilgen Qırımda ana tilinde tasil ala bile.

XS
SM
MD
LG