Herson vilâyetiniñ Novoalekseyevka qasabasında sentâbrniñ 1-de esas Ukrainada ilk qırımtatar sınıfı açıldı.
Qırım.Aqiqat mühbiriniñ bildirgenine köre, Novoalekseyevkanıñ 1-inci nomeralı mektepte Bilgi kününe bağışlanğan tantanalı merasimlerni akimiyet, Qırımtatar Milliy Meclisi ve Türkiyedeki qırımtatar diasporasınıñ temsilcileri ziyaret etti.
«Memleket zor vaziyette, lâkin balalar içün er şey yapamız. Qırımtatar tilinde derslikler ketirdik, amma bu tek başlanğıçtır. Ukraina devletinde ana tilimizde laf ete bilemiz, bu büyük bir baht. Amma er daqqa vaqtınca işğal etilgen Qırımda olğanlarnı tüşünemiz. Qırımnı azat etsek, Kyivden degil, Bağçasaray, Aqmescitten kelecekmiz, bu balalar ise Qırımğa dostlarına kelecek», – dep qayd etti öz çıqışında Meclis reisi, Ukraina halq deputatı Refat Çubarov.
Çubarov Qurban bayramını da tebrikledi.
«Bizler, Ukraina prezidentiniñ Qırımdaki temsilciligi olaraq, vatanımız Qırımnı Ukrainağa qaytarmaq içün bütün ğayretini kösterecekmiz», – dep qayd etti Ukraina prezidentiniñ Qırımdaki daimiy temsilcisi İzet Gdanov.
Geniçesk rayon devlet memuriyetiniñ yolbaşçısı Aleksandr Vorobyevniñ qayd etkenine köre, talebelerniñ yarısından ziyadesi qırımtatarı olğan mektepte «milliy medeniyetler birleşe».
Yerli memuriyetniñ yolbaşçı muavini Gülnara Bekirova Qırım.Aqiqatqa izaat berip, Novoalekseyevkanıñ 1-inci nomeralı mektebinde talebelerniñ 60-70%-ı ve ocalarnıñ 50%-ı qırımtatar halqınıñ vekilleri ola.
Onıñ aytqanına köre, bu sene mektepte 81 talebe birinci sınıfqa kirdi. Olardan on ekisi qırımtatar sınıfında oquycaqtır.
Novoalekseyevkadaki 1 nomeralı mektep – esas Ukrainada qırımtatar tili ve edebiyatı fen olaraq ögrenilgen yekâne mekteptir.
Yerli meclisniñ malümatına köre, Herson vilâyetinde 10 biñden ziyade qırımtatarı yaşay. Ekseriyeti Geniçesk rayonında otura.
