Link açıqlığı

Saatnıñ esas haberi

Qırımda qumnıñ çıqarılması aqibetinde deñiz mahlüqları öle ve felâketler ola – aqyarlı alim


Qurucılıq malzemeleri içün, ayrıca Keriç köpürini qurmaq maqsadınen qumnıñ çıqarılması deñiz mahlüqlarını öldüre ve tabiiy felâketlerge sebep ola. Böyle fikirni Aqyardaki Deñiz biologik taqiqatlar İnstitutınıñ plankton bölüginiñ müdiri Aleksandr Boltaçöv Qırım.Aqiqat Radiosınıñ efirinde seslendirdi.

«Qumnıñ çıqarılması aqibetinde tüpteki biotsenoz yoq etile, yuvulması vaqıtında ise ufaq parçalar 200 kilometr radiusta darqalıp, Qara deñizdeki balıqlarnıñ havyarını öldüre, planton mahlüqatınıñ nefes organlarına tüşe – yani, bütün canlı varlıqlarğa zarar ketire. Bundan da ğayrı, öz altın qumı ile meşur olğan Kezlev sailleriniñ 80% şimdi taş ve çamurnen örtülgen. Qumnıñ esapsız çıqarılması aqibetinde yer köçişleri de yüz bere. Bakal beli endi çökti – ada oldı. Açılğan yerden keçken suv endi köylerni basa, quyular tuzlandı, bütün ekosistema deñişip başlay», – dedi alim.

Keriç köpüri ve «Tavrida» yolunıñ qurucılığı sebebinden yarımadadaki rus akimiyeti, qurucılıq malzemeleriniñ yetişmemezligi aqqında beyan etti. Malzemelerni parom keçitinden Qırımğa ketirmek qıyın olğanından sebep, çaqıl, qum ve başqa malzemelerni Qırımda qazıp çıqarmağa qarar alınğan edi.

XS
SM
MD
LG