Avgustnıñ 31-nde, cumaaqşamı künü Kefe şeer şurasınıñ nevbetten tış toplaşuvında deputatlar şeer memuriyetiniñ yolbaşçısı Stanislav Krısinni ve şeer şura reisi Svetlana Gevçükni işten boşatqanlar. Bunı Kafanews haber ete.
Şeer şura toplaşuvı qapalı surette keçirilgen.
Avgustnıñ 28-nde Qırımınıñ rusiyeli yolbaşçısı Sergey Aksönov beyan etti ki, Kefeniñ şimdiki başı Stanislav Krısin ve şeer şura reisi Svetlana Gevçük «öz vazifelerini becerip olamay» ve yaqın zamanda istifa arizalarını yazacaqlar. Stanislav Krısin öz isteginen istifa arizasını yazğanını tasdiqladı.
Bundan evel Mahkeme icracıları Federal hızmetiniñ Qırımdaki idare yolbaşçısı olğan Stanislav Krısin iyün ayında Kefe şeer şurasınıñ nevbetten tış toplaşuvında Kremlge tabi olğan Kefe şeer idaresiniñ yolbaşçısı vazifesine tain etilgen edi.
Kefeniñ sabıq yolbaşçısı Dmitriy Şepetkov 2015 senesi dekabr ayında qabar talap etkeninde qabaatlanıp tutılğan edi. Bundan soñ Şepetkovğa qarşı ekinci cinaiy dava açıldı, o vazife vekâletleriniñ aşuvınen bağlı edi. 2016 senesi aprel ayında Kefe şeer şura deputatları, apis etilgen Şepetkov ile añlaşmanı bozdılar.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
