Rusiye işğal etken Qırımğa yaqın Herson vilâyetiniñ Novoalekseyevka qasabasında qırımtatarca ders körecek sınıf açılacaqtır. Bunı Ukraina prezidentiniñ Qırımdaki daimiy temsilcisi Boris Babin Qırım.Aqiqatqa bildirdi.
«Bu esas Ukrainada qırımtatarca ders körecek ilk sınıftır», – dep qayd etti o.
Boris Babin sentâbrniñ 1-de qırımtatar sınıfınıñ tantanalı açılışını ziyaret etmege niyetlene.
«Geniçesk rayonında qırımtatarlar toplu şekilde otura. Anda ekinci kere sürgün etilgen insanlar yaşay: 70-inci yılları Qırımğa qaytıp, anda kirip olamağan ya da tekrar sürgün etilgenler. Qırımnıñ yanında yerleşken ediler. Qırımğa eñ yaqın olğan demiryol stantsiyalarında yerleşe ediler: Novoalekseyevka. Partizanı. Ve ilâhre. Olar Qırımğa bağlı, temsilcilik olarğa da diqqat ayıracaq», – dep qayd etti Babin.
Avgustnıñ 17-de Ukraina prezidenti Petro Poroşenko Qırım Muhtar Cumhuriyetindeki daimiy temsilcisi olaraq Boris Babinni tayin etti.
2015 senesi Herson vilâyetiniñ Novoalekseyevka qasabasında esas Ukrainadaki bala bağçalarında ilk qırımtatar gruppası açılğan edi.
Novoalekseyevkadaki 1 nomeralı mektep – esas Ukrainada qırımtatar tili ve edebiyatı fen olaraq ögrenilgen yekâne mekteptir.
