Link açıqlığı

Tasil nazirligi: Qırımda birinci sınıf talebelerine derslikler yetmey


Oquv yılınıñ başlaması arfesinde Qırımnıñ bütün mektepleri birinci sınıf talebeleri içün derslik almadı. Bunı Qırımnıñ Rusiye tasil naziri Natalya Gonçarova avgustnıñ 29-da Kreml nezareti altındaki Qırım parlamentiniñ toplaşuvında ayttı, dep bildire Qırım.Aqiqat mühbiri.

«Bu sene 22,7 biñ birinci sınıf talebesi olacağını bekleymiz. Men bellesem, olarnıñ sayısı daa çoq olacaq, arizalar daa kele. Bazı mektepler başlanğıç mektepler içün qoşma derslikler satın ala. Bunı evelden tahmin etmege çaremiz olmadı – bu em demografik, em migratsion ceryanıdır. Amma oktâbrniñ 1-ne qadar birinci sınıf talebelerine bütün derslikler berilecek», – dep qayd etti Gonçarova.

Baarde Rusiyege tabi Qırımnıñ tasil, ilim ve gençlik nazirligi ukrain tili ve edebiyatı dersliklerini neşir etmege vade etken edi.

Avgustnıñ 29-dan başlap Aqmescitniñ kommunal hızmetleri mekteplerni aşıqa-aşıqa cıyıştıra. Şeerniñ Rusiye memuriyeti avgustnıñ 8-de mekteplerniñ aman-aman 70 fayızı qızdıruv mevsimine azır, dep bildirgen edi.

XS
SM
MD
LG