Avgustnıñ 29-nda Qırımda Kreml nezaretindeki Aqmescit şeer memuriyeti yolbaşçısınıñ birinci yardımcısı Aleksandr Ovdiyenko ve şeer yolbaşçısınıñ yardımcısı yardımcısıYuriy Tur kendi isteginen işten boşağanlarına dair ariza yazğan.
Bu aqta avgustnıñ 29-nda öz Facebook saifesinde Kreml tarafından tayin etilgen Qırım ükümetiniñ yolbaşçısı Sergey Aksönov biildirdi .
Şimdilik Ovdiyenko ve Turnıñ meselenen bağlı daa iç bir izaatı yoq.
Belli olğanı kibi, avgustnıñ 29, salı künü, Kreml nezaretindeki Aqmescit şeer memuriyetiniñ yolbaşçısı Gennadiy Baharev sağlığınıñ zayıf olması sebebinden işten boşaycağına dair ariza yazğan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
