Kreml nezaretindeki Aqmescit şeer memuriyetiniñ yolbaşçısı Gennadiy Baharev, sağlığınıñ zayıf olması sebebinden işten boşaycağınen bağlı ariza yazdı, dep bildire avgustnıñ 29-nda öz Facebook saifesinde Kreml tarafından tayin etilgen Qırımnıñ yolbaşçısı Sergey Aksönov.
«Onıñ vazifesini şimdilik şeer memuriyeti yolbaşçısınıñ yardımcısı, Aqmescit memuriyeti apparatınıñ reberi Aleksandrova Galina Viktorovna yürsetecek», – dep qayd ete o.
Aksönovnıñ sözlerine binaen, şeerde acele çezilmesi kerek olğan problemalarnıñ adı-esabı yoq ve onıñ fikrine köre, Aqmescitniñ başına «eyi bir idareci, işkir, sistematik bir şekilde çalışmağa bilgen, ekstremal iş tempine ayaq uyduracaq, doğru, zaman-zaman standart olmağan qararlar berecek, şeerdeki vaziyet içün üzerine mesuliyet alabilecek bir reber kerek».
Aksönov yaqında, Aqmescit şeer memuriyetiniñ yolbaşçılığı içün ilân berilecegini de qayd etti.
Şimdilik Gennadiy Baharevniñ meselenen bağlı daa iç bir izaatı yoq.
Qırımda Aqmescitniñ rusiyeli memuriyetiniñ istifa etme ihtimali aqqında çoqtan berli söz yürsetile edi. Tafsilâtlıca Qırım.Aqiqat materialında oquñız.
Gennadiy Baharev 2006-2014 seneleri arasında Aqmescitniñ Jeleznodorojnıy rayon şurasına yolbaşçılıq yapqan edi. Qırım Rusiye tarafından işğal etilgen Baharev Aqmescit şeer memuriyeti reisi vazifesine tayin etildi. Sentâbrniñ soñunda o Aqmescit memuriyeti yolbaşçısı vazifesinin vaqtınca tayin etilere, 2014 senesi noyabr ayında öz vazifesinde tamamile tasdıqlandı.
