Sentâbrniñ 1-nde Aqmescitte qırımtatar tilinde tasil berecek mektep açılacaq. Anda artıq 800 bala qabul etildi ve daa devam etmekte. Bu aqta avgustnıñ 29-nda Kreml nezaretindeki Qırım parlamentiniñ toplaşuvında Qırımnıñ rusiyeli tasil naziri Natalya Gonçarova bildirdi.
«Sentâbrniñ 1-nden itibaren Aqmescitniñ «Fontanı» mikrorayonında yerleşken ve 825 kişilik kontingentke saip 44-nci mektep çalışıp başlaycaq. Artıq 800 bala qabul etildi. Ocalar taqımı da azır. Mektep rusça ve qırımtatarca olaraq eki tilde tasil berecek», – dep qayd etti Gonçarova.
İyül ayında qırımtatar faalllerden biri olğan Riza Asanov Qarasuvbazar rayonınıñ memuriyetini «qırımtatarlarına nisbeten yapılğan diskriminatsiyağa qulaq asmalarına» çağırğan edi. Öylelikne mektep «milliy» statusından marum etildi, mektep tamir etilmedi ve avtobus mektepke köy balalarını derc başlamasına bir buçuq saat qalğanda ketire.
Qırım Rusiye nezareti altına keçkeninden soñ, qırımtatarları defalarca basqı altında olğanları aqqında bildirgen ediler. Albuki Qırımnıñ rusiyeli akimiyeti Qırımda yaşağan halqlarnıñ aq-uquqları musaviy olğanını aytmaqta.
Ukrain uquq qoruyıcılarınıñ malümatına köre, işğal altındaki Qırımda qırımtatar balalarınıñ tek üçte biriana tilinde laf etebile, ukrain tilinde qonuşqan balalarnıñ yalıñız altıda biri ana tilinde tasil alabile.
