«Delo çesti» (Ğurur meselesi) uquq qoruma komiteti koordinatsion merkeziniñ Qırımdaki yolbaşçısı Viktoriya JukovskayaRNKB bankınıñ SWIFT sistemasından kesilmesini Qırımdaki müşteriler is etmezler dep saya.
Bu fikirinen Jukovskaya Qırım.Aqiqat Radiosınıñ efirinde paylâştı.
«RNKB kerçekten de, pek muim bir bank, ancaq halqara para yollama sistemasından Qırım, taa 2014 senesi kesip taşlanğan edi. Eñ muimi şudır ki, müşterilerge degil de,tek banklarnıñ işine tesir eter. Şimdilik men RNKBniñ SWIFTten kesilmesi nege alıp baracağına baqıp beklemekni teklif etem», – dep qayd etti uquq qıruyıcı.
Rusiyeniñ KHV haber etkeni kibi, SWIFT Finastranen çalışqan programmasınıñ aq saibi olğan büyük şirket Rusiyeniñ sanktsiya altında bulunğan banklarınen çalışmaqnı red etti ve bu mesele Qırımdaki «Tempbank» ve RNKBnen alâqalıdır.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
