Link açıqlığı

2017 senesi Qırım bücetiniñ masrafları 15 mlrd rublege arttı – Rusiye Maliye nazirligi


2017 senesiniñ yedi ayı içindeki Qırımnıñ birleştirilgen bücet masrafı keçken seneniñ aynı müddetine nisbeten 15,3 mlrd rublege arttı. Bunı Rusiye maliye Nazirliginiñ matbuat hızmetiniñ malümatına tayanğan RİA Novosti bidirmekte.

Maliye nazirliginiñ yolbaşçısı İrina Kivikonıñ sözleriine köre, 2017 senesi paralarnıñ büyük bir qısmı yani 36,8 mlrd ruble, ictimaiy saa masraflarına yollanğan. Hususan, tasilge 15,7 mlrd ruble, bu ise keçken yılğa nazaran 2 mlrd rublege ziyadedir. Ayrıca Qırım sakinleriniñ ictimaiy siyaseti ve sağlıq saasına yapılğan masraflar da arttı.

Haber etilgenine köre, ictimaiy siyasetke 2017 senesiniñ ilk yarısında 12,6 mlrd ruble yollanılğan ve bu, keçken sene köstergiçlerine baqqanda, 5,3 mlrd rublege ziyadedir. Sağlıq saasına keçken 2016 seneniñ aynı müddetine nisbeten masraf 5,5 mlrd rublege artqan. Yarım yıl içindeki masraflarnıñ eñ az 0,1 % bir qısmı, kütleviy haber vastaları ve 0,3% milliy mudafaa, milliy telükesizlik ve uquqqoruma küçlerine yollanılğan.

Maliye naziri ikâye etkenine köre, 2017 senesi yanvar-iyül arasında Qırımnıñ birleştirilgen bücetiniñ 40% işletilgen.Keçken yıl köstergiçlerine köre, bu 31,4%ge ziyade. Federal bücetten cumhuriyet bücetine 44,5 mlrd rublelik bücetlerara transferler yollanılğan, bu ise planlaştırılğan yıllıq masraflarnıñ 41,9 %ni teşkil etmekte.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG