Rusiye Donbassta «melez» (gibrid) cenk başlağanında, men bir zenaatdaşım, belli moskvalı bir jurnalistnen, kerçek bir cenkniñ başlanuvı yani – ilân eterek, muntazam ordunıñ kirsetilmesi, uçaqlar qullanaraq, Kyivge ücüm etüv ihtimalini muzakere etken edim. Kreml koridorlarındaki keyflerni yahşı bilgen zenaatdaşım maña böyle bir cenk ancaq bir şartta başlaması – yani ukrain topraqlarında NATO ordusı peyda olğanında mümkün olacağını ayttı. Lâkin Rusiye buña iç bir vaqıt musaade etmez!
İç bir şübem yoqtır ki, o bütünley Rusiye akimiyeti temsilcilerinden eşitken tezislerni bir-bir tekrarağan edi. Lâkin bizler– Kyivdeki paradta adımlağan NATO devletleriniñ askerlerini, ABD mudafaa naziri ve diger NATO azaları bulunğan devlet arbiy nazirlerini köremiz.
Ve iç kimse iç bir türlü «kerçek» cenkni başlatmay. Ondan da ğayrı, zavallı Donbassta ateş kesilüviniñ ilk alâmetleri körünip başlay.
Aslında, men asla şübelenmey edim. Kreml ancaq quvvet ve qatiylikni seve. Rusiye NATOnıñ Avropa şarqına kenişlemesine qarşı narazılıq bildire edi, lâkin alyansqa sabıq Warszawa añlaşmasına kirgen devletler qabul etilip başlağan soñ, Moskva daa evel Sovetler Birliginiñ «tesiri altında» bulunğanlarnı yat ve el uzatılması yasaq olğan bir territoriya sıfatında qabul etip başladı. Bundan soñ Rusiye NATO tamam sabıq sovet sıñırları boylap keçken «qırmızı sızıqtan» keçip olamaz dedi. Añlaşılğanı üzre Moskva, 1940 senelerde Stalin tarafından işğal etilgen Baltika devlerini de SSCBniñ bir qısmı dep bile edi. Amma Latviya, Litva ve Estoniya NATOğa qabul etilgen soñ, Rusiye cenk çıqarmadı.
Rusiye Ukrainağa, o iç bir blokqa kirmeycegini resmiy olaraq ilân etken vaqıtta ücüm etti
Rusiye Gürcistan ve Ukrainağa qarşı cenk çıqardı. Eki devlet de NATO azası olacağına dair plan almağan edi – Ğarptakiler sabıq sovet cumhuriyetleri Avroatlantik integratsiyasını başlağan taqdirde vaziyet kerginleşeceginden qorqıp başladı. Albuki, Avroatlantik integratsiyanıñ olmaması, vaziyetniñ kerginleşmesine alıp bardı. İşte, er şey tamam tersine aylândı!
Rusiye Ukrainağa, o iç bir blokqa kirmeycegini resmiy olaraq ilân etken vaqıtta ücüm etti. Vatandaşlarnıñ ekseriyeti Ukrainanıñ NATOğa kirmesine qol tutmağan vaqıtta ücüm etti. Ukrain ordusı Rusiye ordusına qarşılıq kösterip olamağan ve Yanukoviç qaçmazdan evel, hususiy hızmet ve küç-quvet muessiselerine rusiyeli hainler yolbaşçılıq yapqan vaqıtta ücüm etti.
Rusiye kerçek bir cenkte iştirak etmege istemey. Rusiye talim, hususiy operatsiya, diversiya ve paradlarda istirak etmek istey
Amma eger de Ukraina. NATO azası olmaq çette tursın, aza olacağına dair plan alğan olsa edi, büyük bir ihtimal, iç bir türlü ücüm yapılmaz edi. Avropa da barışıq içinde yaşar edi. İşte bunı, ukrainalılarniñ ekseriyeti añlamay edi. Ve bu, alâ daa Avropadakilerniñ ekseriyeti añlap olamağan bir mesele. Rusiye kerçek bir cenkte iştirak etmege istemey. Rusiye talim, hususiy operatsiya, diversiya ve paradlarda iştirak etmek istey.
Tamam bunıñ içün o er zaman ondan zayıf olğanlarğa ücüm ete.
«Fikir» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mumkün