Azatlıq Radiosı ve «Expreso.TV» telekanalınıen keçirgen umumiy marafon esnasında, Qırımda bu yıl Ukraina Mustaqilligi Kününi keçken senelerge nazaran daa ziyade insan qayd etmekte, dep ikâye etti qırımtatar halqınıñ liderlerinden biri olğan İlmi Umerov.
«Bu yıl inanlarnıñ ziyade faalleşkeni körüne – teller üztüne bayraq asıldı, çiçekler qoyuldı. İnsanlar biri-birine musafirlikke bara, bayramnı qayd eteler. Kütleviy tedbirler yasaqlanğanı içün, olar keçirilmey», – dep qayd ete Umerov.
Aynı künü daa evel Aqmescit vokzalında Ukrain medeniy merkeziniñ faalleri Galina Balaban ve Yelena Popova tutulıp alınğanları aqqında haber etilgen edi.
2016 senesi FSB taqiqçileri İlmi Umerovnı ekstremizmde qabaatlap cinaiy dava açqan ediler.
Ukraina Mustaqilligi Künü avgustnıñ 24-nde qayd etile.
Bu künlerde Milliy politsiya, Milliy gvardiya, Devlet sıñır hızmeti ve fevqulâde vaziyetler Devlet hızmetiniñ hadimleri olaraq 15 biñ kişi soqaqlardaki tertipni qorçalaycaq.
Rusiye işğal etkeni sebebinden Qırımda Ukraina Mustaqillik künü qayd etelmeycek. Keçken yıllar devamında Kreml nezaretindeki yarımada akimiyeti cemaat faalleriniñ Ukrainanıñ doğğan kününe bağışlanğan tedbirler keçirmelerine ruhset bermegen edi. Buña baqmadan, Qırımnıñ çeşit şeerlerinde adet üzre ukrain abideleri tübüne çiçek qoyma ananesi devam ettirilmekte.
Uquq qoruyıcılar qayd etkenine köre, yarımadada ukrain faalleri toqtamadan taqip etilmekte.
1991 senesi avgustnıñ 24-nde Ukraina mustaqilligini ilân etken edi (bu vaqıtqace o SSCB terkibindeki Ukraina Sovet Sotsialist Cumhuriyetine kirmekte edi). Ukrainanıñ 1991 senesi avgustnıñ 24-nde mustaqilliq ilân etmesinen bağlı akt 1991 senesi dekabrniñ 1-nde halqnıñ rey berüvinen tasdıqlanğan edi.
Bu vaqia ancaq 1992 senesi iyün ayında, Yuqarı Şura avgustnıñ 24 Ukraina Mustaqilligi Künü dep sayılacağını ilân etkenden soñ devlet bayramına çevirilgen edi.
24 августа 1991 года Украина провозгласила свою независимость (до тех считать 24 августа Днем Независимости Украины.
