Link açıqlığı

Qırımlılar Ukrainanı Simonenkonıñ şiirlerini oquyaraq Mustaqillik Kününen hayırladılar (video)


Qırımlılar Ukraina Mustaqilligi Kününe bağışlap Vasiliy Simonenkonıñ şiirlerini oqudılar (video)

Qırımlılar Ukraina Mustaqilligi Künü munasebetinen yurtdaşlarına hayırlav azırladılar. Qırımnıñ işğal altında bulunğan Aqyar, Aqmescit, Bahçasaray, Kefe şeerleri Vasiliy Simonennkonıñ «De zaraz vı, katı moğo narodu?» («Halqımnıñ qatilleri, sizler şimdi ne yerdesiñiz?») adlı şiirinden alınğan satırlarnı oqumaq içün bir arağa toplandılar.

Tedbir teşebbüsçileri videoçekim yapılacaq yerler saylânmasınıñ bir mana olğanını qayt eteler. Öyleliknen rolikke, Rusiye prezidenti Vladimir Putin yaqında «rus Mekkesi» olmasını teklif etken Hersonesteki Vladimir katedral kilisesi, etrafında rusiyeli arbiy birlik yerleşken Hersones deñiz feneri, yanında ep Ukraina tarafdarı olğan faalleri tutulıp alınğan Aqmescitteki Taras Şevçenko eykeli, Qırım parlamenti binası ve Kefe politsiya idaresi tüşkendir.

«Rolikniñ ğayesi – millet, etnos, din ve diger mensübiyetine baqmadan - biz epimiz ukrainalı olğanımıznı, esas Ukrainada ya da Qırımda bulunğanımızdan qatiy nazar, epimiz Ukraina vatandaşı olıp qalğanımıznı köstermek istedik», – dep ikâye ete Qırım.Aqiqatqa muracaat iştirakçilerinden biri olğan Mihail Batrak.

«Esas topraqta yaşağan ukrainanlılarğa, aşhane ve ictimaiy ağlarda muzakereler yapqanlarında qırımlılarnıñ epsi haindir dememelerini hatırlatmaq isteymiz. Yarimadada o qadar basqı ve repressiyalar yapılğanına baqmadan, Ukraina vatanperveri olğan pek çoq insan qalğanını unutmasınlar», – dep qayd etti video-muracaat teşebbüsçilerniñ icadiy gruppası.

Ukraina Mustaqilligi Künü avgustnıñ 24-nde qayd etile.

Rusiye işğal etkeni sebebinden Qırımda Ukraina Mustaqillik künü qayd etelmeycek. Keçken yıllar devamında Kreml nezaretindeki yarımada akimiyeti cemaat faalleriniñ Ukrainanıñ doğğan kününe bağışlanğan tedbirler keçirmelerine ruhset bermegen edi. Buña baqmadan, Qırımnıñ çeşit şeerlerinde adet üzre ukrain abideleri tübüne çiçek qoyma ananesi devam ettirilmekte.

Uquq qoruyıcılar qayd etkenine köre, yarımadada ukrain faalleri toqtamadan taqip etilmekte.

1991 senesi avgustnıñ 24-nde Ukraina mustaqilligini ilân etken edi (bu vaqıtqace o SSCB terkibindeki Ukraina Sovet Sotsialist Cumhuriyetine kirmekte edi). Ukrainanıñ 1991 senesi avgustnıñ 24-nde mustaqilliq ilân etmesinen bağlı akt 1991 senesi dekabrniñ 1-nde halqnıñ rey berüvinen tasdıqlanğan edi.

Bu vaqia ancaq 1992 senesi iyün ayında, Yuqarı Şura avgustnıñ 24 Ukraina Mustaqilligi Künü dep sayılacağını ilân etkenden soñ devlet bayramına çevirilgen edi.

XS
SM
MD
LG