Link açıqlığı

Avgustnıñ 24, cumaaqşamı künü, Ukraina Mustaqillik Kününi qayd ete. Devletniñ er yerinde bayram tedbirleri ötkerilecek.

Kyivde Kreşatik soqağında arbiy parad keçirilmesi planlaştırıla.

Bayram çerçivesinde «Qırım evi» muessisesi devletniñ çeşit şeerlerinde bazı tedbirler keçirecek. Kyivde qırımlı Zlata Ogneviç, Elzara Batalova, Azize İbragimova kibi çalğıcı ve oyuncılarnıñ jazz piyanisti ve bestekâr Usein Bekirov, «Shatur-Gudur» pank-gruppası kelmesi beklenile. Ayrıca çeşit türlü master-klass ve dekorativ-ameliy yarmalıqlar keçirilmesi planlaştırıla.

Bunıñ arfesinde Ukrainada milliy bayraq Künü qayd etildi.

Bu künlerde Milliy politsiya, Milliy gvardiya, Devlet sıñır hızmeti ve fevqulâde vaziyetler Devlet hızmetiniñ hadimleri olaraq 15 biñ kişi soqaqlardaki tertipni qorçalaycaq.

Rusiye işğal etkeni sebebinden Qırımda Ukraina Mustaqillik künü qayd etelmeycek. Keçken yıllar devamında Kreml nezaretindeki yarımada akimiyeti cemaat faalleriniñ Ukrainanıñ doğğan kününe bağışlanğan tedbirler keçirmelerine ruhset bermegen edi. Buña baqmadan, Qırımnıñ çeşit şeerlerinde adet üzre ukrain abideleri tübüne çiçek qoyma ananesi devam ettirilmekte.

Uquq qoruyıcılar qayd etkenine köre, yarımadada ukrain faalleri toqtamadan taqip etilmekte.

1991 senesi avgustnıñ 24-nde Ukraina mustaqilligini ilân etken edi (bu vaqıtqace o SSCB terkibindeki Ukraina Sovet Sotsialist Cumhuriyetine kirmekte edi). Ukrainanıñ 1991 senesi avgustnıñ 24-nde mustaqilliq ilân etmesinen bağlı akt 1991 senesi dekabrniñ 1-nde halqnıñ rey berüvinen tasdıqlanğan edi.

Bu vaqia ancaq 1992 senesi iyün ayında, Yuqarı Şura avgustnıñ 24 Ukraina Mustaqilligi Künü dep sayılacağını ilân etkenden soñ devlet bayramına çevirilgen edi.

XS
SM
MD
LG