Link açıqlığı

Ukrainanıñ sabıq prezidenti Leonid Kravçuk, yaqın zamanda Rusiyeniñ geosiyasiy problemaları işğal altındaki Qırımnı ekinci sırağa çeker dep saya. Bu aqat o ukrain «Apostrof» neşirine bergen intervyusında söz yürsetti.

«Bügünki künde Qırım aqqında em optimistik, em pissimistik şekilde laf etmek mümkün. Lâkin men optimistim. Men bellesem, yaqın zamanda Rusiyeniñ Qırımnen oğraşmağa alı qalmaz. Aynı şekilde Donbassqa da qulaq asmaz. O yalıñız şimdi qopaymaqta. Kün keçken sayın onıñ alı ep fenalaşa. Ve bu tışqı siyasiy ekvilibristikasınıñ iç bir manası yoq», – dep qayd etti Kravçuk.

Onıñ sözlerina köre, halq köterilip, «tarih yaratış meselesini eline alğanda, siyasetniñ dinamizm derecesiniñ şiddetini, farz etmek bile pek qıyın».

«Halq köterilgende o, pek tez deñişmesi mümkün. Onıñ içün şimdi tış faktorlar, tış ekvilibristika ve anda, Kremlde solovyovlar, vorobyovlar kibi siyasetni ağızğa alıp ötken bir sürü «quşlar», bir tış perdedir dep ümit etem. Amma aslında vaziyet olar tüşüngeni kibi, pek basit degil. Er şey pek tez aylânıp ketmesi mümkün. O da, bizim tarafımızğa (Ukraina tarafına - QA) aylânacağına ümit etem», – dep yekünledi siyasetçi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG